Anthologia Vossiana 11 Z (= 407 R = 403 SB)
De uita humiliori
"Viue et amicitias regum fuge". Pauca monebas:
Maximus hic scopulus, non tamen unus, erat.
Viue et amicitias nimio splendore nitentes
Et quicquid colitur perspicuum, fugito.
5
Ingentes dominos et famae nomina clarae
Inlustrique graues nobilitate domos
Deuita et longe uiuus cole; contrahe uela
Et te litoribus cymba propinqua uehat.
In plano semper tua sit fortuna paresque
10
Noueris: ex alto magna ruina uenit.
Non bene cum paruis iunguntur grandia rebus:
Stantia namque premunt, praecipitata ruunt.
11-11a unius carminis instar habet V, cui Tandoi adsentitur. De hoc carm. cf. etiam Gagliardi.
11 A Scaligero in tria (vel quattuor) carmina discerptum, in unum redegit Riese