"Fundite fletus, edite planctus,
Resonet tristi clamore forum:
Cecidit pulchre cordatus homo,
Quo non alius fuit in toto
5
Fortior orbe.
Ille citato uincere cursu
Poterat Celeres, ille rebelles
Fundere Parthos leuibusque sequi
Persida telis, certaque manu
10
Tendere neruum qui praecipites
Vulnere paruo figeret hostes
Pictaque Medi terga fugacis.
Ille Britannos ultra noti
Litora ponti
15
Et caeruleos scuta Brigantas
Dare Romuleis colla catenis
Iussit et ipsum noua Romanae
Iura securis tremere Oceanum.
Deflete uirum quo non alius
20
Potuit citius discere causas,
Vna tantum parte audita,
Saepe neutra. quis nunc iudex
Toto lites audiet anno?
Tibi iam cedet sede relicta,
25
Qui dat populo iura silenti,
Cretaea tenens oppida centum.
Caedite maestis pectora palmis,
O causidici, uenale genus,
Vosque poetae lugete noui,
30
Vosque in primis qui concusso
Magna parastis lucra fritillo."