Canes effugere cum iam non possit fiber
(Graeci loquaces quem dixerunt castorem
Et indiderunt bestiae nomen dei,
Illi qui iactant se uerborum copia),
5
Abripere morsu fertur testiculos sibi,
Quia propter illos sentiat sese peti.
Diuina quod ratione fieri non negem;
Venator namque simul inuenit remedium,
Omittit ipsum persequi et reuocat canes.
10
Hoc si praestare possent homines, ut suo
Vellent carere, tuti posthac uiuerent;
Haud quisquam insidias nudo faceret corpori.