Olim Prometheus saeculi figulus noui
Cura subtili Veritatem fecerat,
Vt iura posset inter homines reddere.
Subito accersitus nuntio magni Iouis
5
Commendat officinam fallaci Dolo,
In disciplinam nuper quem receperat.
Hic studio accensus, facie simulacrum pari,
Vna statura, simile et membris omnibus,
Dum tempus habuit callida finxit manu.
10
Quod prope iam totum mire cum positum foret,
Lutum ad faciendos illi defecit pedes.
Redit magister, quo festinanter Dolus
Metu turbatus in suo sedit loco.
Mirans Prometheus tantam similitudinem
15
Propriae uideri uoluit artis gloriam.
Igitur fornaci pariter duo signa intulit;
Quibus percoctis atque infuso spiritu
Modesto gressu sancta incessit Veritas,
At trunca species haesit in uestigio.
20
Tunc falsa imago atque operis furtiui labor
Mendacium appellatum est, quod negantibus
Pedes habere facile et ipse adsentio.