Aduersus omnes fortis et uelox feras
Canis cum domino semper fecisset satis,
Languere coepit annis ingrauantibus.
Aliquando obiectus hispidi pugnae suis,
5
Arripuit aurem; sed cariosis dentibus
Praedam dimisit rictus. uenator dolens
Canem obiurgabat. cui senex contra Lacon:
"Non te destituit animus, sed uires meae.
Quod fuimus lauda, si iam damnas quod sumus."
10
Hoc cur, Philete, scripserim pulchre uides.