Phaedrus fabulae 4, 1

Altre sezioni


Qui natus est infelix, non uitam modo

Tristem decurrit, uerum post obitum quoque

Persequitur illum dura fati miseria.

Galli Cybebes circum in quaestus ducere

5

Asinum solebant, baiulantem sarcinas.

Is cum labore et plagis esset mortuus,

Detracta pelle sibi fecerunt tympana.

Rogati mox a quodam, delicio suo

Quidnam fecissent, hoc locuti sunt modo:

10

"Putabat se post mortem securum fore:

Ecce aliae plagae congeruntur mortuo!"