Humanitati qui se non accommodat
Plerumque poenas oppetit superbiae.
Cicada acerbum noctuae conuicium
Faciebat, solitae uictum in tenebris quaerere
5
Cauoque ramo capere somnum interdiu.
Rogata est ut taceret. multo ualidius
Clamare occepit. rursus admota prece
Accensa magis est. noctua, ut uidit sibi
Nullum esse auxilium et uerba contemni sua,
10
Hac est adgressa garrulam fallacia:
"Dormire quia me non sinunt cantus tui,
Sonare citharam quos putes Apollinis,
Potare est animus nectar, quod Pallas mihi
Nuper donauit; si non fastidis, ueni;
15
Vna bibamus." illa, quae arebat siti,
Simul gaudebat uocem laudari suam,
Cupide aduolauit. noctua, obsepto cauo,
Trepidantem consectata est et leto dedit.
Sic, uiua quod negarat, tribuit mortua.