Canis et thesaurus et uulturius
Haec res auaris esse conueniens potest
Et qui humiles nati dici locupletes student.
Humana effodiens ossa thensaurum canis
Inuenit, et uiolarat quia Manes deos
5
Iniecta est illi diuitiarum cupiditas,
Poenas ut sanctae religioni penderet.
Itaque aurum dum custodit oblitus cibi,
Fame est consumptus. Quem stans uulturius super
Fertur locutus. "O canis, merito iaces,
10
Qui concupisti subito regales opes,
Triuio conceptus, educatus stercore."