Phaedrus fabulae 1, 22

Testo base di riferimento: B. E. Perry, 1965

Cura dell'edizione digitale: C. Renda, 2010

Inserimento e controllo dei dati: P. Marzano

Altre sezioni


Mustela et homo

Mustela ab homine prensa, cum instantem necem

Effugere uellet, "Parce, quaeso," inquit "mihi,

Quae tibi molestis muribus purgo domum."

Respondit ille: "Faceres si causa mea,

5

Gratum esset et dedissem ueniam supplici.

Nunc quia laboras ut fruaris reliquiis,

Quas sunt rosuri, simul et ipsos deuores,

Noli imputare uanum beneficium mihi."

Atque ita locutus improbam leto dedit.

10

Hoc in se dictum debent illi agnoscere,

Quorum priuata seruit utilitas sibi,

Et meritum inane iactant inprudentibus.