Asinus ad senem pastorem
In principatu commutando ciuium
Nil praeter dominum, non res mutant pauperes.
Id esse uerum parua haec fabella indicat.
Asellum in prato timidus pascebat senex.
5
Is hostium clamore subito territus
Suadebat asino fugere, ne possent capi.
At ille lentus: "Quaeso, num binas mihi
Clitellas impositurum uictorem putas?"
Senex negauit. "Ergo quid refert mea
10
Cui seruiam, clitellas dum portem unicas?"