Ex sutore medicus
Malus cum sutor inopia deperditus
Medicinam ignoto facere coepisset loco
Et uenditaret falso antidotum nomine,
Verbosis adquisiuit sibi famam strophis.
5
Hic cum iaceret morbo confectus graui...
Rex urbis, eius experiendi gratia
Scyphum poposcit: fusa dein simulans aqua
Illius se miscere antidoto toxicum,
Combibere iussit ipsum, posito praemio.
10
Timore mortis ille tum confessus est
Non artis ulla medicum se prudentia,
Verum stupore uulgi factum nobilem.
Rex aduocata contione haec edidit:
"Quantae putatis esse uos dementiae,
15
Qui capita uestra non dubitatis credere
Cui calceandos nemo commisit pedes?"
Hoc pertinere uere ad illos dixerim,
Quorum stultitia quaestus impudentiae est.