Annua uenerunt Cerealis tempora sacri:

      Secubat in uacuo sola puella toro.

Flaua Ceres, tenues spicis redimita capillos,

      Cur inhibes sacris commoda nostra tuis?

5

Te, dea, munificam gentes, ubi quaeque, loquuntur,

      Nec minus humanis inuidet ulla bonis.

Ante nec hirsuti torrebant farra coloni,

      Nec notum terris area nomen erat,

Sed glandem quercus, oracula prima, ferebant:

10

      Haec erat et teneri caespitis herba cibus.

Prima Ceres docuit turgescere semen in agris,

      Falce coloratas subsecuitque comas.

Prima iugis tauros supponere colla coegit

      Et ueterem curuo dente reuellit humum.

15

Hanc quisquam lacrimis laetari credit amantum

      Et bene tormentis secubituque coli?

Nec tamen est, quamuis agros amet illa feraces,

      Rustica nec uiduum pectus amoris habet.

Cretes erunt testes; nec fingunt omnia Cretes:

20

      Crete nutrito terra superba Ioue.

Illic sideream mundi qui temperat arcem

      Exiguus tenero lac bibit ore puer;

Magna fides testi: testis laudatur alumno;

      Fassuram Cererem crimina nota puto.

25

Viderat Iasium Cretaea diua sub Ida

      Figentem certa terga ferina manu;

Vidit et, ut tenerae flammam rapuere medullae,

      Hinc pudor, ex illa parte trahebat amor.

Victus amore pudor: sulcos arere uideres

30

      Et sata cum minima parte redire sui;

Cum bene iactati pulsarant arua ligones,

      Ruperat et duram uomer aduncus humum

Seminaque in latos ierant aequaliter agros,

      Irrita decepti uota colentis erant.

35

Diua potens frugum siluis cessabat in altis;

      Deciderant longae spicea serta comae.

Sola fuit Crete fecundo fertilis anno:

      Omnia, qua tulerat se dea, messis erat;

Ipse locus nemorum canebat frugibus Ide

40

      Et ferus in silua farra metebat aper.

Optauit Minos similes sibi legifer annos;

      Optasset, Cereris longus ut esset amor.

Qui tibi secubitus tristes, dea flaua, fuissent,

      Hos cogor sacris nunc ego ferre tuis.

45

Cur ego sim tristis, cum sit tibi nata reperta

      Regnaque quam Iuno sorte minora regat?

Festa dies Veneremque uocat cantusque merumque:

      Haec decet ad dominos munera ferre deos.