Ouidius amores 2, 15

Reference basis text: E. J. Kenney, 1961

Editing of the digital edition: A. Romeo, 2009

Other sections


Anule, formosae digitum uincture puellae,

      In quo censendum nil nisi dantis amor,

Munus eas gratum; te laeta mente receptum

      Protinus articulis induat illa suis;

5

Tam bene conuenias quam mecum conuenit illi,

      Et digitum iusto commodus orbe teras.

Felix a domina tractaberis, anule, nostra:

      Inuideo donis iam miser ipse meis.

O utinam fieri subito mea munera possem

10

     Artibus Aeaeae Carpathiiue senis!

Tunc ego te cupiam, domina, et tetigisse papillas

      Et laeuam tunicis inseruisse manum:

Elabar digito quamuis angustus et haerens

     Inque sinum mira laxus ab arte cadam.

15

Idem ego, ut arcanas possim signare tabellas

      Neue tenax ceram siccaque gemma trahat,

Vmida formosae tangam prius ora puellae;

      Tantum ne signem scripta dolenda mihi.

*Si dabor ut condar* loculis, exire negabo

20

      Adstringens digitos orbe minore tuos.

Non ego dedecori tibi sim, mea uita, futurus,

      Quodue tener digitus ferre recuset, onus.

Me gere, cum calidis perfundes imbribus artus,

      Damnaque sub gemma perfer euntis aquae.

25

Sed, puto, te nuda mea membra libidine surgent,

     Et peragam partes anulus ille uiri.

Inrita quid uoueo? paruum proficiscere munus:

      Illa datam tecum sentiat esse fidem.

1

uincture ς

iuncture ς

vincire P

uincire S H