Quid mihi, Liuor edax, ignauos obicis annos

      Ingeniique uocas carmen inertis opus,

Non me more patrum, dum strenua sustinet aetas,

      Praemia militiae puluerulenta sequi

5

Nec me uerbosas leges ediscere nec me

     Ingrato uocem prostituisse foro?

Mortale est, quod quaeris, opus; mihi fama perennis

     Quaeritur, in toto semper ut orbe canar.

Viuet Maeonides, Tenedos dum stabit et Ide,

10

      Dum rapidas Simois in mare uoluet aquas;

Viuet et Ascraeus, dum mustis uua tumebit,

     Dum cadet incurua falce resecta Ceres;

Battiades semper toto cantabitur orbe:

      Quamuis ingenio non ualet, arte ualet;

15

Nulla Sophocleo ueniet iactura cothurno;

      Cum sole et luna semper Aratus erit;

Dum fallax seruus, durus pater, improba lena

     Viuent et meretrix blanda, Menandros erit;

Ennius arte carens animosique Accius oris

20

      Casurum nullo tempore nomen habent;

Varronem primamque ratem quae nesciet aetas

      Aureaque Aesonio terga petita duci?

Carmina sublimis tunc sunt peritura Lucreti,

      Exitio terras cum dabit una dies;

25

Tityrus et fruges Aeneiaque arma legentur,

      Roma triumphati dum caput orbis erit;

Donec erunt ignes arcusque Cupidinis arma,

     Discentur numeri, culte Tibulle, tui;

Gallus et Hesperiis et Gallus notus Eois,

30

      Et sua cum Gallo nota Lycoris erit.

Ergo cum silices, cum dens patientis aratri

      Depereant aeuo, carmina morte carent:

Cedant carminibus reges regumque triumphi,

      Cedat et auriferi ripa benigna Tagi.

35

Vilia miretur uulgus; mihi flauus Apollo

      Pocula Castalia plena ministret aqua,

Sustineamque coma metuentem frigora myrtum

     Atque a sollicito multus amante legar.

Pascitur in uiuis Liuor; post fata quiescit,

40

     Cum suus ex merito quemque tuetur honos:

Ergo etiam cum me supremus adederit ignis,

     Viuam, parsque mei multa superstes erit.