Ouidius amores 1, 3

Reference basis text: E. J. Kenney, 1961

Editing of the digital edition: A. Romeo, 2009

Other sections


Iusta precor: quae me nuper praedata puella est

      Aut amet aut faciat cur ego semper amem.

A, nimium uolui: tantum patiatur amari;

      Audierit nostras tot Cytherea preces.

5

Accipe, per longos tibi qui deseruiat annos;

      Accipe, qui pura norit amare fide.

Si me non ueterum commendant magna parentum

      Nomina, si nostri sanguinis auctor eques,

Nec meus innumeris renouatur campus aratris,

10

      Temperat et sumptus parcus uterque parens:

At Phoebus comitesque nouem uitisque repertor

     Hac faciunt et me qui tibi donat Amor

Et nulli cessura fides, sine crimine mores,

      Nudaque simplicitas purpureusque pudor.

15

Non mihi mille placent, non sum desultor amoris:

      Tu mihi, si qua fides, cura perennis eris;

Tecum, quos dederint annos mihi fila sororum,

      Viuere contingat teque dolente mori;

Te mihi materiem felicem in carmina praebe:

20

     Prouenient causa carmina digna sua.

Carmine nomen habent exterrita cornibus Io

      Et quam fluminea lusit adulter aue

Quaeque super pontum simulato uecta iuuenco

     Virginea tenuit cornua uara manu.

25

Nos quoque per totum pariter cantabimur orbem

      Iunctaque semper erunt nomina nostra tuis.

12

Hac Palmer ad her. 1, 103

haec P S ω

hoc ς

hinc Merkel