Donarem pateras grataque commodus,
Censorine, meis aera sodalibus,
Donarem tripodas, praemia fortium
Graiorum, neque tu pessuma munerum
5
Ferres, diuite me scilicet artium
Quas aut Parrhasius protulit aut Scopas,
Hic saxo, liquidis ille coloribus
Sollers nunc hominem ponere, nunc deum.
Sed non haec mihi uis, nec tibi talium
10
Res est aut animus deliciarum egens:
Gaudes carminibus; carmina possumus
Donare, et pretium dicere muneri.
Non incisa notis marmora publicis,
Per quae spiritus et uita redit bonis
15
Post mortem ducibus, [non celeres fugae
Reiectaeque retrorsum Hannibalis minae
Non incendia Karthaginis inpiae
Eius qui domita nomen ab Africa
Lucratus rediit] clarius indicant 
20
Laudes quam Calabrae Pierides, neque
Si chartae sileant quod bene feceris,
Mercedem tuleris. quid foret Iliae
Mauortisque puer, si taciturnitas
Obstaret meritis inuida Romuli?
25
Ereptum Stygiis fluctibus Aeacum
Virtus et fauor et lingua potentium
Vatum diuitibus consecrat insulis.
[Dignum laude uirum Musa uetat mori]
Caelo Musa beat. sic Iouis interest
30
Optatis epulis inpiger Hercules,
Clarum Tyndaridae sidus ab infimis
Quassas eripiunt aequoribus ratis,
[Ornatus uiridi tempora pampino]
Liber uota bonos ducit ad exitus.
contatti: 