Festo quid potius die
Neptuni faciam? prome reconditum,
Lyde, strenua Caecubum
Munitaeque adhibe uim sapientiae.
5
Inclinare meridiem
Sentis et, ueluti stet uolucris dies,
Parcis deripere horreo
Cessantem Bibuli consulis amphoram?
Nos cantabimus inuicem
10
Neptunum et uiridis Nereidum comas:
Tu curua recines lyra
Latonam et celeris spicula Cynthiae:
Summo carmine, quae Cnidon
Fulgentisque tenet Cycladas et Paphon
15
Iunctis uisit oloribus,
Dicetur merita Nox quoque nenia.