Quo me, Bacche, rapis tui
Plenum? quae nemora aut quos agor in specus
Velox mente noua? quibus
Antris egregii Caesaris audiar
5
Aeternum meditans decus
Stellis inserere et consilio Iouis?
Dicam insigne, recens, adhuc
Indictum ore alio. non secus in iugis
10
Hebrum prospiciens et niue candidam
Thracen ac pede barbaro
Lustratam Rhodopen, ut mihi deuio
Ripas et uacuum nemus
Mirari libet. o Naiadum potens
15
Baccharumque ualentium
Proceras manibus uertere fraxinos,
Nil paruum aut humili modo,
Nil mortale loquar. dulce periculum est,
O Lenaee, sequi deum
20
Cingentem uiridi tempora pampino.