Horatius carmina 3, 25

Testo base di riferimento: F. Klingner, 1959

Cura dell'edizione digitale: G. C. Musa, 2009

Altre sezioni


Quo me, Bacche, rapis tui

Plenum? quae nemora aut quos agor in specus

Velox mente noua? quibus

Antris egregii Caesaris audiar

5

Aeternum meditans decus

Stellis inserere et consilio Iouis?

Dicam insigne, recens, adhuc

Indictum ore alio. non secus in iugis

Exsomnis stupet Euhias

10

Hebrum prospiciens et niue candidam

Thracen ac pede barbaro

Lustratam Rhodopen, ut mihi deuio

Ripas et uacuum nemus

Mirari libet. o Naiadum potens

15

Baccharumque ualentium

Proceras manibus uertere fraxinos,

Nil paruum aut humili modo,

Nil mortale loquar. dulce periculum est,

O Lenaee, sequi deum

20

Cingentem uiridi tempora pampino.

2

aut Ω V

et R Prisc. 2, 259, 20; Victorin. 6, 175, 4