Vxor pauperis Ibyci,
Tandem nequitiae fige modum tuae
Famosisque laboribus;
Maturo propior desine funeri
5
Inter ludere uirgines
Et stellis nebulam spargere candidis.
Non, siquid Pholoen satis,
Et te, Chlori, decet: filia rectius
Expugnat iuuenum domos,
10
Pulso Thyias uti concita tympano.
Illam cogit amor Nothi
Lasciuae similem ludere capreae:
Te lanae prope nobilem
Tonsae Luceriam, non citharae decent
15
Nec flos purpureus rosae
Nec poti uetulam faece tenus cadi.