Rectius uiues, Licini, neque altum
Semper urgendo neque, dum procellas
Cautus horrescis, nimium premendo
Litus iniquum.
5
Auream quisquis mediocritatem
Diligit, tutus caret obsoleti
Sordibus tecti, caret inuidenda
Sobrius aula.
Saepius uentis agitatur ingens
10
Pinus et celsae grauiore casu
Decidunt turres feriuntque summos
Fulgura montis.
Sperat infestis, metuit secundis
Alteram sortem bene praeparatum
15
Pectus: informis hiemes reducit
Iuppiter, idem
Submouet; non, si male nunc, et olim
Sic erit: quondam cithara tacentem
Suscitat Musam neque semper arcum
20
Tendit Apollo.
Rebus angustis animosus atque
Fortis adpare, sapienter idem
Contrahes uento nimium secundo
Turgida uela.