Quis deus hoc medium flammauit crinibus aurum,
Iussit et in dumis sentibus esse rosam?
Aspicis ut magni coeant in foedus amantes:
Martem spina refert, flos Veneris pretium est.
5
Quid tibi cum magnis, puer, est, lasciue, sagittis?
Hoc melius telo pungere corda potes!
Nec flammas quaeras neque †alti pectoris ignis:
Si tibi uer tantum praebeat ista, sat est.
Pallens herba uiret: color est hic semper amantum.
10
Tam fugitiua rosa est quam fugitiuus amor.
Nam quod floricomis gaudet lasciua metallis,
Aurum significat uilius esse rosa.