Ad fora pictoris dum numina lignea gestans
Venalesque deos tendit asellus iners,
Vertice detecto uel flexo poplite turba
Obuia cum precibus numina sancta colit.
5
Gaudet iners tanto secum sublimis honore,
Virtutes. mores, gesta, genus numerans.
Sors uaga cuncta rotat: olitorem nactus asellus
Allia cum porris fertque refertque forum.
Horret turba procul et olenti cedit asello.
10
Hic stupet ignarus et gemebundus ait:
"Cur sic contemnor? cur tanti cessit honoris
Gloria? quae coluit me modo, turba fugit.
Haec est lex mundi: genitum consistere quicquam
Non ualet. Hic factus †portheor alter ego."
15
Se putat indigne mutatum functus honore,
Post positos fasces uilis ad ima cadens.