Cum sua cornua Luna
Condit in aere prima,
Signat abunde, sequentes
Imbre madescere soles.
5
Si dabit ore ruborem
Virgineo aurea Phoebe,
Monstrat in orbe futuros
Flamina fundere uentos.
Puraque si sit in ortu
10
Cynthia uespere quarto,
Totius haec erit index
Mensis arescere soles.
Iam maculis ubi mane
Sol uariauerit ortum,
15
Fit notus imbre ruenti
Arboribusque sinister.
Ast ubi pallidus ipse est,
Crastina uel rubet hora,
Hinc fluit horrida tectis
20
Et ferit omnia grando
Igneus hic notat euros,
Caeruleus docet imbres,
Et rutilans maculosus
Fundere dat mare uentos.
25
Denique si occidet auro
Lucidus aut micet ortu,
Permanet aether amoenus:
Cede pauescere nimbos.
Etsi aquilone moueri
30
Cernis in arbore frondes,
Te leuis aura docebit,
Tempora credere clara.
Dumque polum astra relinquunt
Flammea terga sinentes,
35
Iam male flamina curuis
Temperat unda carinis;
Hinc super ardea nubes
Mergus et aequora scandit,
Hinc fulicaeque marinae
40
Littore ludere pergunt.
Si tonat en domus euri,
Si zephyrique resultant,
Si boreasque coruscat
(Maxima turbinis arma haec):
45
Vallibus effugit hinc grus
Et lacus ambit hirundo,
Coruus et agmina confert,
Garrit et improba cornix,
Bucula hinc bibit auras
50
Naribus ardua spectans,
Hinc canit horrida rana,
Vermis et efferit oua.
Ast †potus imbre notaret,†
Aethera quando serenant,
55
Cum bene sidera splendent
Et micat ore Selena.
Haec tibi signa manebunt
Omnia tempore tuta;
Ast tua cura ualebit
60
Noscere iura polorum.