Si fontis breuis unda latens demersa tenetur,
Ignotae et uiles esse putantur aquae.
Quas cum docta manus produxerit arte magistra,
Pura fit exiliens lympha uocata manu:
5
Tunc praegnantis humi laxantur uiscera partu
Et subito sterilis flumina terra creat.
Non aliter ualidum genuino robore lignum
Imbutis digitis dextra domare solet,
Arboris et speciem humanis non usibus aptam
10
Cogit in externum crescere factor opus.
Sed cum te potior, Seneca meliore magistro
Quique monens lucem cordis habere facis,
Non dubitare queam, Lucillo clarius illo
Aeternas Christi sumere dantis opes.
15
Cedat opus priscum uera nec luce coruscans
Nec de catholici dogmatis ore fluens.
Ille mihi commenta dedit te uera docente;
Nec dedit infida quae sibi mente tulit.
Nam cum depretio mortis regnante perenni
20
Lucillum imbueret, hac sine morte perit.
At tu cum doceas homines superesse beatos
Ex obitu Christum morte sequendo pia,
Erigis et Senecam dominus uerusque magister
Ingeniis fidei me superare facis.
25
Vnde precor: Lucillum alium nec pectore talem,
Quae me nosse cupis, scire precando iube;
Discipulumque tuum, prius isto nomine ditans,
Conforta, reuoca, corripe, disce, mone.