Primus, Iane, tibi sacratur nomine mensis,
Vndique cui semper cuncta uidere licet.
Vmbrarum est alter, quo mense putatur honore
Peruia terra dato Manibus esse uagis
5
Condita Mauortis magno sub numine Roma
Non habet errorem. Romulus auctor erit.
Caesareae est Veneris mensis, quo floribus arua
Compta uirent, auibus quo sonat omne nemus.
Hos sequitur laetus toto iam corpore Maius,
10
Mercurio et Maiae quem tribuisse iuuat.
Iunius ipse sui causam tibi nominis edit,
Praegrauida attollens fertilitate sata.
Quam bene, Quintilis, mutasti nomen: honori
Caesareo, Iuli, te pia causa dedit.
15
Tu quoque, Sextilis, uenerabilis omnibus annis
Numinis Augusti nomine notus eris.
Tempora maturis, September, uincta racemis
Vela tegant: numero nosceris ipse tuo.
Octobri laetus portat uindemitor uuas:
20
Omnis ager Bacchi munera uoce sonat.
Frondibus amissis repetunt sua frigora mensem,
Cum iuga Centaurus celsa retorquet eques.
Argumenta tuis festis concludo, December,
Quis quemuis annum claudere iure potes.