Circus imago poli, formam cui docta uetustas
Condidit et numeros limitis aetherei.
Nam duodenigenas ostendunt ostia menses
Quaeque ineat cursim aureus astra iubar.
5
Tempora cornipedes referunt, elementa colores;
Auriga, ut Phoebus, quattuor aptat equos.
Cardinibus propriis includunt septa quadrigas,
Ianus uexillum quas iubet ire leuans.
Ast ubi panduntur funduntque repagula currus
10
Vnus et ante omnes cogitat ire prius,
Metarum tendunt circumdare cursibus orbes;
Namque axes gemini ortum obitumque docent.
Iamque his Euripus quasi magnum interiacet aequor,
Et medius centri summus obliscus adest.
15
Septem etiam gyri claudunt certamina palmae,
Quot caelum stringunt cingula sorte pari.
Lunae biga datur semper Solique quadriga
Castoribus simpli rite dicantur equi.
Diuinis constant nostra spectacula rebus,
20
Gratia magna quibus creuit honore deum.