Accipe, quaeso,

Nunc bipedali

Condita uersu

Carminulorum

5

Munera parua;

Tuque frequenter

Mutua nobis

Obsequiorum

Debita redde.

10

Nam uelut aestu

Flantibus austris

Arida gaudent

Imbribus arua,

Sic tua nostras

15

Missa frequenter

Laetificabat

Pagina mentes.

Non ego posco

Nunc periturae

20

Munera gazae,

Non quod auarus

Semper egendo

Congregat aurum,

Quod sapientum

25

Lumina caecat

Et uelut ignis

Flamma perurit

Improba corda.

Saepe nefanda

30

Crimina multis

Suggerit auri

Dira cupido,

E quibus ista

Nunc tibi pauca

35

Tempore prisco

Gesta retexam.

Extitit ingens

Causa malorum

Aurea pellis.

40

Corruit auri

Munere paruo

Cena deorum,

Et tribus illis

Maxima lis est

45

Orta deabus;

Hinc populauit

Troiugenarum

Ditia regna

Dorica pubes.

50

Iuraque legum

Fasque fidesque

Rumpitur auro,

Impia quippe

Pigmalionis

55

Regis ob aurum

Gesta leguntur.

Sic Polidorum

Hospes auarus

Incitus auro

60

Fraude necauit.

Femina saepe

Perdit ob aurum

Casta pudorem.

Non Iouis auri

65

Fluxit in imbre;

Sed quod adulter

Obtulit aurum,

Aureus ille

Fingitur imber.

70

Amphiaraum

Prodidit auro

Perfida coniunx.

Hectoris heros

Vendidit auro

75

Corpus Achillis.

Hoc reserari

Munere certo

Nigra feruntur

Limina Ditis.

80

Nunc ego possem

Plura referre,

Ni breuitatis

Causa uetaret.

Haec tibi, frater

85

Inclite, parua

Litterularum

Munera mittens,

Suggero uanas

Linquere curas;

90

Desine, quaeso,

Nunc animosos

Pascere pingui

Farre caballos,

Lucraque lucris

95

Accumulando

Desine nummis

Addere nummos.

Vt quid iniquis

Consociaris,

100

Munera quorum

Crebra receptas?

Odit iniqui

Munera Christus.

Haec sapienti

105

Dispicienda,

Qui fugitiuae

Atque caducae

Cernere debet

Tempora uitae;

110

Sufficit autem

Ista loquaci

Nunc cecinisse

Carmina uersu.

Nam noua forsan

115

Esse uidetur

Ista legenti

Formula uersus.

Sed tamen illa

Graiugenarum

120

Inclyta uates

Nomine Sapho

Versibus istis

Dulce solebat

Edere carmen.

125

Si tibi cura

Forte uolenti

Carmina tali

Condere uersu,

Semper ut unus

130

Ordine certus

Dactilus istic

Incipiat pes;

Inde sequenti

Parte trocheus

135

Proximus illi

Rite locetur;

Saepe duabus

Claudere longis

Vltima uersus

140

Iure licebit.

Tu modo, frater

Alme Fidoli,

Nectare, si uis,

Dulcior omni,

145

Floridiora

Doctiloquorum

Carmina linquens,

Friuola nostra

Suscipe laetus.

150

Sic tibi Christus,

Arbiter orbis,

Omnipotentis

Vnica proles,

Dulcia uitae

155

Gaudia reddat,

Qui sine fine

Nomine patris

Cuncta gubernans

Regnat in aeuum.

160

Haec tibi dictaram morbis oppressus acerbis,

Corpore quos fragili patior tristique senecta;

Nam dum praecipiti labuntur tempora cursu,

Nunc ad olympiadis ter senae uenimus annos.

Omnia praetereunt, fugit inreparabile tempus;

165

Viue, uale laetus tristisque memento senectae.