Columbanus carmen navale


En siluis caesa fluctu meat acta carina

Bicornis Hreni et pelagus perlabitur uncta.

Heia uiri! nostrum reboans echo sonet heia!

Extollunt uenti flatus, nocet horridus imber,

5

Sed uis apta uirum superat sternitque procellam.

Heia uiri! nostrum reboans echo sonet heia!

Nam caedunt nimbi studio, caeditque procella,

Cuncta domat nisus, labor improbus omnia uincit.

Heia uiri! nostrum reboans echo sonet heia!

10

Durate et uosmet rebus seruate secundis,

O passi grauiora, dabit deus his quoque finem.

Heia uiri! nostrum reboans echo sonet heia!

Sic inimicus agit inuisus corda fatigans,

Ac male temptando quatit intima corda furore.

15

Vestra, uiri, Christum memorans mens personet heia!

State animo fixi, hostisque spernite strofas,

Virtutum uosmet armis defendite rite.

Vestra, uiri, Christum memorans mens personet heia!

Firma fides cuncta superat studiumque beatum,

20

Hostis et antiquus cedens sua spicula frangit.

Vestra, uiri, Christum memorans mens personet heia!

Rex quoque uirtutum, rerum fons, summa potestas,

Certanti spondet, uincenti praemia donat.

Vestra, uiri, Christum memorans mens personet heia!