sylloge cod. Elnonensis 2

Altre sezioni


Conditur hoc tumulo raptus florentibus annis

Hermeno orbis amor, nimium dilectus amicis,

Clarus, <auis> atauisque potens, insignis honore,

Quem decorat genitor, multarum gloria laudum,

5

Sarmatio, aeternae meruit qui praemia famae,

Esse iter ad summum docuit dum culmen honorum

A primo coepisse loco. Spectata laboris

Successu placuit uirtus. In culmine summo

Per cunctos uenisse gradus uergentibus annis

10

Reddiderat uirtute parem patris atque parentum

Adsimilem uotis. Nisi te fortuna tulisset,

Solus tu patriis poteras praecellere rebus.

Quamuis et proprio iam dudum nomine clarus

Posses ornatus <satis et sat> honestus haberi,

15

Attamen hunc titulum claris natalibus auget

Matronale decus, † uenusta stemmate, Manda.

Quicquid praecipuum pulchrumque in moribus ambo

Eximii tenuere patres, iam solus haberes,

Fecisset si uita moras, qui tempore paruo

20

Cuncta <haec>, quae longo uitae capiuntur in actu,

Ante decem plenum compleras omnia lustrum.

Post quadraginta sextum uix porrigis annum,

Virtute egregius, nulli pietate secundus,

Largus opum fandique potens, praesignis honore,

25

Quod solus superesse potest. Te uota sequantur,

Teque in paradisum sancti comitentur euntem.