elogium Asbadi


Si non mortalis sors inreuocabilis aeui

      Fletibus atque fides poneret ipsa modum,

Asbade maiorum, quos uirtus extulit, instar,

      Fortibus exemplum corpore mente uiris

5

Continuata tuam lugerent secula mortem

      Iusticiumque tibi publica res ageret,

Innumeris cuius micat illustrata triumphis,

      Quos dedit occasus, contulit et oriens.

Rexisti fortes equitum peditumque cateruas

10

      Iure magisterii nobilitate gradu.

Tu bello Gothias expulsis gentibus Alpes

      Dedisti Latio uictor id imperio.

Per te diuersae destructis moenibus urbes

      Gaudent ad priscum se remeasse decus.

15

Post te solamen superest lugentibus unum,

      Gloria quod tecum non tumulata iacet.