Fortem fidelem militem,
Caeli secutum principem,
Dionysium martyrem
Plebs corde, uoce personet.
5
Clemente Roma praesule
Ab urbe missus adfuit,
Verbi superni seminis
Vt fructus esset Galliae.
Opus sacratum construit;
10
Fidem docet baptismatis,
Sed audientium caecitas
Munus repellit seminis.
Instante sacro antistite
Errore plebem soluere
15
Dum spem salutis ingerit,
Tormenta mortis incidit.
Tenetur a gentilibus
Christi placens altaribus,
Amore tantae gloriae
20
Poenas libenter excipit.
Vnum quod illi defuit,
Pro rege colla tradidit:
Dilectionem pectoris
Ceruice caesa prodidit.
25
Magnus sacerdos qui dabat
Templi sacrata munera,
Fuso beato sanguine
Est factus ipse uictima.
Felix pio de uulnere,
30
Quae poena palmam praebuit!
Qui morte mortem conteris,
Nunc regna caeli possides.
Gloria sit deo patri,
Gloria unigenito,
35
Vna cum sancto spiritu
In sempiterna saecula.