Culmen honorificum, patrum pater, archisacerdos
Pontificale decus, proficiente gradu
Quem fidei titulus meritis erexit in altum,
Ecclesiaeque caput distribuente deo,
5
Discipule egregii, bone Magnerice, Niceti,
Nominis auspicio magne canende tui,
Clare sacro merito tanto informante magistro,
Quem reparas operum fructificante loco,
Cuius, opime, sequax sancta et uestigia seruans
10
Rite minister agens ecce magister ades
Auctorisque pii successor dignus haberis
Heredisque sui frugiparensque manes.
Creuit post obitum pater et te crescere fecit:
Dum capit ille polum, tu capis arce locum.
15
Grex alitur per te uice praecessoris, alumne,
Nec sua damna dolet, dum tua lucra tenet.
Fratribus optandus, iucundus honore ministris
Carius et populis pastor amore places.
Te panem esuriens, tectum hospes, nudus amictum,
20
Te fessus requiem, spem peregrinus habet.
Haec faciens intende magis, uenerande sacerdos,
Vt commissa tibi dupla talenta feras.
Pro Fortunato exorans quoque dulcis amator
Spem mihi dans ueniae, sit tibi palma, pater.