Sic hesterna dies totas mihi transtulit horas,
Vt matris uocem non meruisse querar:
Qualiter agnus amans genetricis ab ubere pulsus
Tristis et herbosis anxius errat agris
5
(Nunc fugit ad campos feriens balatibus auras,
Nunc redit ad caulas, nec sine matre placent),
Sic me de uestris absentem suggero uerbis;
Vix tenet incluso nunc domus una loco.
Sed refero hinc grates placidae caraeque sorori
10
Quod me consuluit de pietatis ope.
Tu retines medium, medium me possidet illa:
Cum geminas uideo, tunc ego totus ago.
Nunc tibi, cara, precor Martinus, Hilarius astent,
Et te uel natos spes tegat una deus.