Inter delicias uarias mixtumque saporem
Dum dormitarem dumque cibarer ego
(Os aperiebam, claudebam rursus ocellos
Et manducabam somnia plura uidens),
5
Confusos animos habui, mihi credite, carae,
Nec ualui facile libera uerba dare.
Non digitis poteram, calamo neque pingere uersus,
Fecerat incertas ebria Musa manus.
Nam mihi uel reliquis sic uina bibentibus apta
10
Ipsa uidebatur mensa natare mero.
Nunc tamen, ut potui, matri pariterque sorori
Alloquio dulci carmina parua dedi.
Etsi me somnus multis impugnat habenis,
Haec dubitante manu scribere traxit amor.