Flere monent populum crudelia funera regum,
Cum caput orbis humo maesta sepulchra tegunt.
Hoc igitur tumulo recubans Chlodobercthus habetur,
Qui tria lustra gerens raptus ab orbe fuit,
5
De proauo ueniens Chlodouecho celsa propago,
Chlodacharique nepos Chilpericique genus;
Quem de regina sumpsit Fredegunde iugali,
Auserat et nascens Francica uota puer.
Quo patris et patriae dum spes adolesceret ampla,
10
Accelerante die sors inimica tulit.
Sed cui nulla nocent queruli contagia mundi,
Non fleat ullus amor, quem modo cingit honor.
Nam puer innocuus uiuens sine crimine lapsus
Perpetui regni se fauet arce frui.