Venantius Fortunatus carminum libri 8, 7

Altre sezioni


Frigoris hiberni glacie constringitur orbis

      Totaque lux agri flore carente perit.

Tempore uernali, dominus quo Tartara uicit,

      Surgit aperta suis laetior herba comis.

5

Inde uiri postes et pulpita floribus ornant,

      Hinc mulier roseo complet odore sinum.

At uos non uobis, sed Christo fertis odores,

      Has quoque primitias ad pia templa datis.

Texistis uariis altaria festa coronis,

10

      Pingitur ut filis floribus ara nouis.

Aureus ordo crocis, uiolis hinc blatteus exit,

      Coccinus hinc rubricat, lacteus inde niuet.

Stat prasino uenetus: pugnant et flore colores,

      Inque loco pacis herbida bella putas.

15

Haec candore placet, rutilo micat illa decore;

      Suauius haec redolet, pulchrius illa rubet.

Sic specie uaria florum sibi germina certant,

      Vt color hic gemmas, tura reuincat odor.

Vos quoque quae struitis haec, Agnes cum Radegunde,

20

      Floribus aeternis uester anhelet odor.