Nubila quae rapido perflante Aquilone uenitis,

      Pendula sidereo quae mouet axe rota,

Dicite qua uegitet carus mihi Gogo salute,

      Quid placidis rebus mente serenus agit:

5

Si prope fluctiuagi remoratur litora Rheni,

      Vt salmonis adeps rete trahatur aquis;

An super uuiferi Mosellae obambulat amnem,

      Quo leuis ardentem temperet aura diem,

Pampinus et fluuius medios ubi mitigat aestus:

10

      Vitibus umbra rigens, fluctibus unda recens;

Aut Mosa dulce sonans, quo grus ganta anser olorque est,

      Triplice merce ferax (alite pisce rate)

An tenet herbosis qua frangitur Axona ripis,

      Cuius aluntur aquis pascua prata seges?

15

Esera? Sara? Cares? Scaldis? Sate? Somena? Sura?

      Seu qui Mettis adit de sale nomen habens?

Aut aestiua magis nemorum saltusque pererrans

      Cuspide, rete feras hinc ligat, inde necat?

Ardenna an Vosagus cerui caprae helicis uri

20

      Caede sagittifera silua fragore tonat?

Seu ualidi bufali ferit inter cornua campum,

      Nec mortem differt ursus onager aper?

An sua rura colens exusta noualia sulcat

      Et rude ceruici taurus aratra gemit?

25

Siue palatina residet modo laetus in aula,

      Cui scola congrediens plaudit amore sequax?

An cum dulce Lupo pietatis iura retractant

      Consilioque pari mitia mella creant,

Quo pascatur inops, uiduae solacia praestent,

30

      Paruus tutorem sumat, egenus opem?

Quidquid agunt, pariter felicia uota secundent,

      Et ualeant Christi regis amore frui.

Vos precor, o uenti, qui curritis atque reditis,

      Pro Fortunato nuntia ferte suo.