Nectar uina cibus uestis doctrina facultas
Muneribus largis tu mihi, Gogo, sat es;
Tu refluus Cicero, tu noster Apicius extas:
Hinc satias uerbis, pascis et inde cibis.
5
Sed modo da ueniam: bubla turgente quiesco,
Nam fit lis uteri, si caro mixta fremat.
Hic, ubi bos recubat, fugiet puto pullus et anser:
Cornibus et pinnis non furor aequus erit.
Et modo iam somno languentia lumina claudo:
10
Nam dormire meum carmina lenta probant.