Palma sacerdoti, uenerando Tetrice cultu,
Te patriae sedes, nos peregrina tenent.
Te custode pio numquam lupus abstulit agnum,
Nec de fure timens pascua carpsit ouis;
5
Sex qui lustra gerens et per tres insuper annos
Rexisti placido pastor amore gregem.
Nam ut condirentur diuino corda sapore,
Fudisti dulcem iugiter ore salem.
Summus amor legum, populi decus, arma parentum,
10
Ecclesiae cultor, nobilitatis honor,
Esca inopum, tutor uiduarum, cura minorum:
Omnibus officiis omnia, pastor, eras.
Sed cui praebebat uarie tua cura medellam,
Funere rectoris plebs modo triste gemit.
15
Hoc tamen, alme pater, speramus: dignus in astris
Qualis honore nites, hic pietate probes.