Turbine sub mundi cum persequebantur iniqui

      Christicolasque daret saeua procella neci.

Frigore depulso succendens corda peregit

      Rupibus in gelidis feruida bella fides;

5

Quo, pie Maurici, ductor legionis opimae

      Traxisti fortes subdere colla uiros

Quos positis gladiis armasti dogmate Pauli

      Nomine pro Christi dulcius esse mori.

Pectore belligero poterant qui uincere ferro

10

      Inuitant iugulis uulnera cara suis;

Hortantes se clade sua sic ire sub astra

      Alter in alterius caede natauit heros.

Adiuuit rapidas Rhodani fons sanguinis undas,

      Tinxit et Alpinas ira cruenta niues.

15

Tali fine polos felix exercitus intrans

      Iunctus apostolicis plaudit honore choris;

Cingitur angelico uirtus trabeata senatu:

      Mors fuit unde prius, lux fouet inde uiros.

Ecce, triumphantum ductor fortissime, tecum

20

      Quattuor hic procerum pignora sancta iacent;

Sub luteo tumulo latitat caeleste talentum

      Diuitiasque dei uilis arena tegit,

Qui faciunt sacrum paradisi crescere censum

      Heredes domini luce perenne dati.

25

Sidereo chorus iste throno cum carne locandus,

      Cum ueniet iudex arbiter orbis, erit.

Sic pia turba simul, festinans cernere Christum,

      Vt caelos peteret, de nece fecit iter.

Fortunatus enim per fulgida dona tonantis,

30

      Ne tenebris crucier, quaeso feratis opem.