Venantius Fortunatus carminum libri 1, 18

Altre sezioni


Est locus, aestifero quamuis sit tempore feruor,

      Quo uiret adsidue flore refectus ager,

Respirant croceis depicta coloribus arua,

      Fragrat odoriferis blandior herba comis.

5

Incola Bissonnum uocat hunc de nomine prisco

      (Milia septem urbs hinc Burdegalensis abest);

Qua possessor amans praetoria grata locauit,

      Partibus atque tribus porticus aequa subit.

Strauerat ipsa solo senio rapiente uetustas,

10

      Perdiderat uultum forma decora suum:

Haec meliore uia reuocat labor ille Leonti,

      Quo praesente domos nulla ruina premit;

Nunc quoque prosperius uelut aula sepulta resurgit

      Et fauet auctori uiuificata suo.

15

Reddidit interea prisco noua balnea cultu,

      Quo recreant fessos blanda lauacra uiros.

Hic referunt nutrisse lupos deserta tenentes:

      Intulit hic homines, expulit unde feras.