Quisquis lucifero sortitur munere saeclum,
Occasu potius proditur ille suo.
Cunctaque mundano currentia tempore gesta,
Vel bona uel probra, omnia morte cadunt.
5
Phoebus nempe nitens merito producitur ortu,
Si pronus claro clauserit orbe diem.
Consulibus atauis pollens hic SILVIA corpus
Terrenum liquit caelica regna petens.
Insignis gemino uitae quae sidere fulsit
10
Culminibus saeclo, religione deo.
Natorum splendore potens, subfulta uigore
Gaudebat partu se reparasse patres.
Vnde sacerdotii claro dotatus honore
Et celsum meruit cernere patricium.
15
Ter quinum rapida uergebant tempora lustrum
Et super adiectus tertius annus erat.
Martius aurati redimitus sidere ueris
Nono sole micans praemia tanta tulit.
Haec suprema dies, caelesti in limite prima,
20
Quam rapuit saeclo, hanc dedit ipsa polo.
Pignora desistant lacrimis planctuque grauari;
Non placeat gemere, quod celebrare decet.