De eo qui podium amphitheatri saliebat
Amphitheatralem podium transcendere saltu
Velocem audiui iuuenem, nec credere quiui
Hunc hominem, potius sed auem, si talia †geret†.
Et posui huic, fateor, me Dorica uina daturum,
5
Conspicere ut possim tanti noua facta laboris.
Aspexi uictusque dedi promissa petenti
Atque meo grauior leuis extitit ille periclo.
Non iam mirabar sumtis te, Daedale, pinnis
Isse per aetherios natura errante meatus:
10
Hunc magis obstipui, coram qui plebe uidenti
Corpore, non pinnis, fastigia summa uolauit.