Cum iuuenem super astra Iouem Natura locaret

      Susciperetque nouus regna uetusta deus,

Certauere suum uenerari numina numen

      Disparibusque modis par cecinere sophos.

5

Mars clangente tuba patris praeconia dixit

      Laudauitque sono fulmina fulmineo;

Arcas et Arcitenens fidibus strepuere sonoris,

      Doctior hic citharae pulsibus, ille lyrae;

Castalidumque chorus uario modulamine plausit,

10

      Carminibus, cannis, pollice, uoce, pede.

Sed post caelicolas etiam mediocria fertur

      Cantica semideum sustinuisse deus.

Tunc Faunis Dryades Satyrisque Mimallones aptae

      Fuderunt lepidum, rustica turba, melos.

15

Alta cicuticines liquerunt Maenala Panes

      Postque chelyn placuit fistula rauca Ioui.

Hos inter Chiron, ad plectra sonantia saltans,

      Flexit inepta sui membra facetus equi;

Semifer audiri meruit meruitque placere,

20

      Quamuis hinnitum, dum canit, ille daret.

Ergo sacrum diues et pauper lingua litabat

      Summaque tunc uoti uictima cantus erat.

Sic nos, o Caesar, nostri spes maxima saecli,

      Post magnos proceres paruula tura damus,

25

Audacter docto coram Victore canentes,

      Aut Phoebi aut uestro qui solet ore loqui;

Qui licet aeterna sit uobis quaestor in aula,

      Aeternum nobis ille magister erit.

Ergo colat uariae te, princeps, hostia linguae;

30

      Nam noua templa tibi pectora nostra facis.