Cantemus, Socii, Domino, cantemus honorem,
Dulcis amor Christi personet ore pio.
Primus ad ima ruit magna de luce superbus:
Sic homo, cum tumuit, primus ad ima ruit.
5
Vnius ob meritum cuncti periere minores:
Saluantur cuncti unius ob meritum.
Sola fuit mulier, patuit quae ianua leto:
Et qua uita redit, sola fuit mulier.
Frater iniquus erat iustum qui perculit olim:
10
Damnator Christi frater iniquus erat.
Transitus ille monet, quid prima amisit origo:
Quid uentura parent, transitus ille monet.
Arca leuatur aquis, homines ut perderet aequor:
Ne pereant homines, arca leuatur aquis.
15
Sume, pater, populos pro nati uulnere cunctos:
Cum tradis Christum, sume, pater, populos.
Hostia summa Patris, tacitis signata figuris:
Quam reserat Christus, hostia summa Patris.
Claudicat ecce uidens Dominum, dum praeualet, heres:
20
Aspera gens Christum claudicat ecce uidens.
Reppulit ille famem, uenitus crimine fratrum:
Venditus est Christus, reppulit ille famem.
Perfide, corde peris, dum uastant omnia plagae:
Dum cessant plagae, perfide, corde peris.
25
Agnus ab hoste sacer reuocauit sanguine patres:
Sanguine nosque refert agnus ab hoste sacer.
Obruit unda nefas populo gradiente per aequor:
Nunc populis mundi obruit unda nefas.
Murmurat impietas, manna ueniente refecta:
30
Panis adest Christus, murmurat impietas.
Plebs sibi dura caput terrae cultoris adoptat:
Abstulit, heu, Christum plebs sibi dura caput.
Lex dedit indicium ueteris de crimine poenae:
Quodque salus ueniat, lex dedit indicium.
35
En lapis irriguus, satiare, incredule, fonte:
Qui Christum reprobas, en lapis irriguus.
Carpitur igne sacro munus uotumque piorum:
Seditiosa tribus carpitur igne sacro.
Regna beata Patris legis non contigit heres:
40
Iesus dispensat regna beata Patris.
Distruit arca Dei, muros dum circuit, hostem:
Sic hostem mundi distruit arca Dei.
Area uellus habet, madido sed uellere sicca est:
Siccum tota madens area uellus habet.
45
Vincis honore Dei promisso in munere gentes:
Affectum natae uincis honore Dei.
Tu decus omne tuis, qui sternis caede Goliam:
Qui uincis mundum, tu decus omne tuis.
Maxima dona Dei cuncti cecinere prophetae:
50
Impleuit Christus maxima dona Dei.
Pondera dura tulit mandatum legis et iram:
Gratia mandati pondera dura tulit.
Virgo Maria nitet nullo temerante pudore:
Post partum pueri uirgo Maria nitet.
55
Filius hic hominis fit maxima quaestio mundi:
Nobiscum Deus est filius hic hominis.
Gaudia magna Dei mundus percepit et ambit:
Respuit, heu, mundus gaudia magna Dei.
Signa mouent populos, cernunt magnalia caeci:
60
Nulla tamen duros signa mouent populos.
Aspera mors populis ligno deducta cucurrit:
Aufertur ligno aspera mors populis.
Ipse tulit Dominus pro poenis munera seruis:
Pro seruis poenas ipse tulit Dominus.
65
Vita beata necem miseris auertere uenit:
Pertulit a miseris uita beata necem.
Lumen adesse Dei persensit tartarus ingens:
Nec cernunt homines lumen adesse Dei.
Mors fera per hominem miserum sibi subdidit orbem:
70
Subdita congemuit mors fera per hominem.
Suscitat ecce genus morti pater ille profanus:
Ad uitam Christus suscitat ecce genus.
Hic populus Dominum dura ceruice negauit:
Suscepit primus hic populus Dominum.
75
Sanguine laeta redit fuso gens impia Christi:
Gustato Christi sanguine laeta redit.
Crimina cuncta suis terrenus contulit auctor:
Dissoluit Christus crimina cuncta suis.
Libera corda sibi facinus deuinxerat olim:
80
Nunc reficit Christus libera corda sibi.
Fortia uincla dedit peccati saeua potestas:
Dulcis amor Christi fortia uincla dedit.
Iam super astra sedet, cuncti exsultate fideles:
Perfide, quid saeuis? iam super astra sedet.
85
Mortuus ille tonat, caelum terramque subegit:
Quid facient hostes? mortuus ille tonat.
Pellitur umbra die, Christo ueniente figura:
Christus adit gentes, pellitur umbra die.
Te properare docent et signa et saecula prima:
90
Sacra quae gerimus te properare docent.
Vnicus adueniens firmauit uota priorum:
Vota dedit nobis unicus adueniens.
Passio, Christe, tui compleuit munera legis:
Munera nostra replet passio, Christe, tui.
95
Hic homo qui Deus est, spes est antiqua priorum:
Spes in fine piis hic homo, qui Deus est.
Munus erit fidei toto credentibus aeuo:
Qui dedit ut credant, munus erit fidei.
Te ueniente, Deus, mundanus concidit error:
100
Occidit hic mundus te ueniente, Deus.
Gratia plena Dei est, quae totis gentibus extat:
Abscedant sectae, gratia plena Dei est.
Sola columba redit, quae totum circuit orbem:
Discedant corui, sola columba redit.
105
Adueniet Dominus dare digna piis, mala prauis:
Credite iam, miseri, adueniet Dominus.
Visio, Christe, tui tormentum et poena malorum
Gloria cuncta bonis uisio, Christe, tui.
Gloria magna Patri, semper tibi gloria, Nate:
110
Cum sancto Spiritu gloria magna Patri.