Impulsus uentis et pressa nube coactus
Ruperat hibernis se grauis imber aquis;
Cumque per effusas stagnaret turbine terras,
Expositum campis fictile pressit opus:
5
Mobile namque lutum tepidus prius instruit aer,
Discat ut admoto rectius igne coqui.
Tunc nimbus fragilis perquirit nomina testae.
Immemor illa sui "Amphora dicor" ait;
"Nam me docta manus rapiente uolumina gyro
10
Molliter obliquum iussit habere latus."
"Hactenus hac, inquit, liceat constare figura:
Nam te subiectam diluet imber aquis."
Et simul accepto uiolentius amne fatiscens
Pronior in tenues uicta cucurrit aquas.
15
Infelix, quae magna sibi cognomina sumens
Ausa pharetratis nubibus ista loqui.
Haec poterunt miseros posthac exempla monere
Subdita nobilibus ne sua fata gemant.