Auianus fabulae 30

Altre sezioni


Vastantem segetes et pinguia culta ruentem

      Liquerat abscisa rusticus aure suem,

Vt memor accepti referens monumenta doloris

      Vlterius teneris parceret ille satis.

5

Rursus in exsculpti deprensus crimine campi

      Perdidit indultae perfidus auris onus.

Nec mora, praedictae segeti caput intulit horrens,

      Poena sed insignem congeminata facit.

Tunc domini captum mensis dedit ille superbis,

10

      In uarias epulas plurima frusta secans.

Sed cum consumpti dominus cor quaereret apri,

      Impatiens fertur quod rapuisse cocus,

Rusticus hoc iustam uerbo compescuit iram,

      Affirmans stultum non habuisse suem.

15

"Nam cur membrorum demens in damna redisset,

      Atque uno totiens posset ab hoste capi?"

Haec illos descripta monent, qui saepius ausi

      Numquam peccatis abstinuere manus.