Horrentes dumos abies pulcherrima risit,
Cum facerent formae iurgia magna suae,
Indignum referens cum istis certamen haberi,
Quod meritis nullus consociaret honor:
5
"Nam mihi deductum surgens in nubila corpus
Verticis erectas tollit in astra comas,
Puppibus et patulis media cum sede locamur,
In me suspensos explicat aura sinus;
At tibi deformem quod dant spineta figuram,
10
Despectum cuncti praeteriere uiri."
Ille refert: "Nunc laeta quidem bona sola fateris
Et nostris frueris imperiosa malis;
Sed cum pulchra minax succidet membra securis,
Quam uelles spinas tunc habuisse meas!"