Quem, precor, inter nos habitura silentia finem?
Quando dabit caras littera grata uices?
Me timidum uel te potius dixisse superbum
Conuenit? alterius crimen utrumque tenet.
5
Transfluxere dies et, dum scripsisse priorem
Paenitet, aeternas itur in usque moras.
Sed quid agam? coepisse uetat reuerentia uestri;
Hinc amor hortatur scribere. uincat amor.
"Fors iuuat audentes" prisci sententia uatis.
10
Hac duce non dubitem te reticente loqui,
Audax ut, si quid penitus peccasse uidebor,
Arguar, ingrati non subiturus onus.
Romanos bibimus primum te consule fontes
Et Latiae cessit Graia Thalia togae,
15
Incipiensque tuis a fascibus omina cepi
Fataque debebo posteriora tibi.
Ergo lacessitus tandem rescribe roganti
Et patria florens sorte, Probine, uale.