Quisquis sollicita mundum ratione secutus
Semina rimatur rerum, quo luna laborat
Defectu, quae causa iubet pallescere solem,
Vnde rubescentes ferali crine cometae,
5
Vnde fluant uenti, trepidae quis uiscera terrae
Concutiat motus, quis fulgura ducat hiatus,
Vnde tonent nubes, quo lumine floreat arcus,
Hoc mihi quaerenti, si quid deprendere ueri
Mens ualet, expediat. lapis est cognomine magnes
10
Decolor obscurus uilis. non ille repexam
Caesariem regum, non candida uirginis ornat
Colla nec insigni splendet per cingula morsu,
Sed noua si nigri uideas miracula saxi,
Tunc pulchros superat cultus et quidquid Eois
15
Indus litoribus rubra scrutatur in alga.
Nam ferro meruit uitam ferrique rigore
Vescitur; hoc dulces epulas, hoc pabula nouit;
Hinc proprias renouat uires; hinc fusa per artus
Aspera secretum seruant alimenta uigorem;
20
Hoc absente perit: tristi morientia torpent
Membra fame, uenasque sitis consumit apertas.
Mauors, sanguinea qui cuspide uerberat urbes,
Et Venus, humanas quae laxat in otia curas,
Aurati delubra tenent communia templi.
25
Effigies non una deis, sed ferrea Martis
Forma nitet, Venerem magnetica gemma figurat.
Illis conubium celebrat de more sacerdos;
Ducit flamma choros; festa frondentia myrto
Limina cinguntur, roseisque cubilia surgunt
30
Floribus, et thalamum dotalis purpura uelat.
Hic mirum consurgit opus; Cytherea maritum
Sponte rapit caelique toros imitata priores
Pectora lasciuo flatu Mauortia nectit
Et tantum suspendit onus galeaeque lacertos
35
Inplicat et uiuis totum complexibus ambit.
Ille lacessitus longo spiraminis actu
Arcanis trahitur gemma de coniuge nodis.
Pronuba fit Natura deis ferrumque maritat
Aura tenax: subitis sociantur numina furtis.
40
Quis calor infudit geminis alterna metallis
Foedera? quae duras iungit concordia mentes?
Flagrat anhela silex et amicam saucia sentit
Materiem placitosque chalybs cognoscit amores.
Sic Venus horrificum belli conpescere regem
45
Et uultu mollire solet, cum sanguine praeceps
Aestuat et strictis mucronibus asperat iras.
Sola feris occurrit equis soluitque tumorem
Pectoris et blando praecordia temperat igni.
Pax animo tranquilla datur, pugnasque calentes
50
Deserit et rutilas declinat in oscula cristas.
Quae tibi, saeue puer, non est permissa potestas?
Tu magnum superas fulmen caeloque relicto
Fluctibus in mediis cogis mugire Tonantem.
Iam gelidas rupes uiuoque carentia sensu
55
Membra feris, iam saxa tuis obnoxia telis,
Et lapides suus ardor agit, ferrumque tenetur
Inlecebris: rigido regnant in marmore flammae.